World Radiography Day 2018

8th November

World Radiography Day 2018

Lallawmzuala Ralte

Khawvelah hian Mi ropui leh hming thang tak tak an awm thin a, an ropuina leh hming thanna erawh a in anglo, chutiangin kan ngaihsan leh ropui kan tih te pawh a in ang lovang. Khawvel Miropui leh hmingthang kan tih te zing a kan sawi hmaih hauhloh tur chu Vawiin a a chanchin kan sawi tur Wilhem Conrad Roentgen'a, Xray hmuchhuaktu chanchin hi a ni awm e.

Wilhem Conrad Roentgen'a chu kum 1845, March Ni 27 khan German ram a khaw pakhat Remscheid Lennep, Rhine Province'ah a lo piang a, A nu hming chu Charlotte Constanze Frowein'i a ni. Roentgen'a hian a damchhungin Award tamtak a dawng a, chung zing a langsar zual te chu:

1. Matteucci Medal (1896)

2. Rumford Medal (1896)

3. Elliot Cresson Medal (1897)

4. Barnard Medal (1900)

5. Nobel Prize in Physics (1901)

Thiamna lamah pawh a theuneulo hle mai a, a hun laia University tha tak takah te pawh Professor hna a thawk thin. Kum 1901 khan Physic subject-ah Khawvela Nobel Prize dawng hmasa ber ni turin Nobel Prize in Physics pek a lo ni ta a ni.

Kum 3 mi a nih laiin Netherland ram a khaw pakhat Apeldron'ah an pem a, chu mi khua a Boarding school pakhat; Martinus Herman Can Doom an tihah chuan a zirna bul a tan ve a. Chutih hun lai chuan, naupang danglam leh thiam thei bik, khawvel mi ropui leh hmingthang a nihna tur reng reng a zirna kawngah leh a miziaah pawh engmah a lang lem lova. Chutih laiin, Zin veivah a, Ramhnuaia Thing leh Mau hmuna vela hun hman te chu nuam a ti hle thin. A lo thang lian zel a, Kum 1862 ah chuan Polytechnic zirna hmun pakhat Utretch'ah chuan a kal ve a, Amaherawhchu, vanduaithlak takin, chutah chuan an zirtirtu chuan a duhsak vakloh avang leh zirtirna tha a dawnloh avangin, chu zirna in chu a bansan ta thuai a ni. Chumi hnuah Zurich khua a Polytechnic'ah Mechanical Engineering lam a zir ta a. Zirna lama a tui hal em avangin Engineering pawh chu a duh tawk mai lova. Nasa leh zual zawka Physics subject zir a duh ta a, Uinversity of Zurich'ah chuan, Physics subject zir turin a kal leh ta a. Mahse, a certifcate neih chhun chu, zirna sang zawk zir turin University chuan an pawm chiah lova, khawngaihna leh hriat thiamna in correspondence a zir tura tih a ni. He University'ah hian an Lecturer Pahnih te; Clausius leh Kundt te chuan an duhsak in, nasatakin a zirna lamah an pui a, phurna leh thathona an siam saka, amah pawh in nasatakin hma a sawn phah a ni. Tichuan, Kum 1869 ah PhD pek a ni a, A zirtir tu Kundt chuan a hnuaia thawk turin a sawm a. Tichuan, University of Wurzburg'ah leh Strasbourg'ah te chuan an kal dun thin a. Kum 1874-ah chuan Strassbourg University a thawk turin Lecturer'ah a tling a, Strassbourg University'ah chuan a thawk ve ta a. Kum 1875 ah Hohenheim, Wurtemberg-a Agriculture zirna hmun puiah chuan Professor hna thawk tura lak a ni ve leh ta a ni.

Kum 1876 ah Strassbourg University'ah bawk chuan Professor of Physics hna chelh turin a lo kir leh a, Chumi atanga kum thum hnu Kum 1879 ah University of Giessen a Physics subject zirna hmunah Hotuber ni turin sawmna chu a pawm leh ta a ni.

Germany leh Netherland a zirna in sang ber berah thawk tura sawmna a hmu nasa hle a, Mahse, a ni tan thawh vek sen a nihloh avangin sawmna tam takah chuan a kal lem lova. Kum 1900-ah Bavarian sorkar-in a ngenna chu pawm loh theihloha ngaiin University of Munich'ah chian Chairman hna a thawk leh ta a ni.

Physics subhect a zir bingna kawngah hian Paper thahnem tak  hrang hrangah present a, physics problem tam tak a published bawk a ni. Chung Paper a present leh a published langsar zual te chu; Specific heat of gases, Thermal conductivity of crystals, Characteristic of electrical and of Quartz; influence of pressure on the refractive indices of various fluids, leh adang tam tak a present a ni.

Kum 1895.November Ni 8. tlai lamah chuan a thil zir bing bik, Patially vacuum tube' chhunga current sang tak nungchang chuan, Roentgen'a rinloh lamah hna nasa tak a lo thawk reng a, a experiment bungrua pakhat Fluorescense of barium Platinocyanide coated screen'a image awm a hmu ta tlat mai. Tichuan, chu a thil hmuh chuan beiseina a siam nasa hle a, chian leh zual tumin a nupui kut/ruh thla ngei chu a enchhin ta a, fluorescence of barium platinocyanide coated screen'ah ngei chuan sawi thiam theih ruallohvin a nupui kut thla chu a zungbun bun lai ngei mai nen chuan a lo lang leh ta a. Hei hi khawvela X-ray thla lak hmasak ber chu a lo ni ta a ni.

He a thil hmuhchhuah avang hian hmun hrang hrangah a hming a larin zah pawh a hlawh em em a ni. Mahse, Roentgen'a chu mi inngaitlawm tak a nih avangin, langsar taka chei bawl a duh ve ngai lova. Hun awl a neih chuan, khawvel mawina zir chiang a, zin khaw thawn te, tlang sang tak taka lawn te pawh a ching ve thin a ni.

A hun tawp lam : Kum 1872 khan Anna Bertha Ludwig nen an innei a, Amaherawhchu, Roentgen'a hian vanduaithlaktakin fa erawh a nei lova, Tichuan, khawvel Scientist ropui leh hmingthang, Xray hmu chhuaktu; Wilhem Conrad Roentgen'a chuan Carcinoma intestine(Ril cancer) avangin he khawvel hi a lo chhuahsan ve ta a ni.